نگہ معمار حسرت ہا چہ آبادی چہ ویرانی
کہ مژگاں جس طرف وا ہو بکفِ دامانِ صحرا ہے

جب وقت و حآلات ، واقعات و صدمات، حآدثات و آفات کو جنم دینے لگتے ہیں ۔۔۔
دل ، دل نہیں قبرستان بن جاتا ہے ،
جہاں ہر دن ایک نئی تمنا ، خواہش کو کفنانا ، دفنانا پڑتا ہے ، دل حسرتوں کے شمار میں گرفتار ہوجاتا ہے ، حیرتوں کے اسرار سے بے زار ہوجاتا ہے ۔۔۔

وہ دل غموں کے بوجھ سے ڈوبنے لگتا ہے ، آنکھیں دل کی ایسی لاچاری پہ گہر لٹانے لگتی ہیں ۔۔۔
تب ایک نئی کیفیت کا جنم ہوتا ہے ، دل خود سے انتقام لینے لگتا ہے ، حسرتوں کے مقابل تن جاتا ، خود آزاری کی کیفیت عود کر آتی ہے۔۔
تب آنکھیں جو دل کا آئینہ ہوتی ہیں ، دل کی اس سرگرمی میں اپنا حصہ ڈآلنا نہیں بھولتی ۔۔۔
اپنے ارد گرد وہی کچھ دیکھتی ہیں جو دل دکھاتا ہے ۔۔۔دل جو آنکھوں کا سودائی بن جاتا ہے ، آنکھیں جو دل کے لیے رسوائی خرید لاتی ہیں ۔۔

نگاہیں حسرتوں کی تعمیر کرنے میں لگ گئیں ہیں ، ان کے آگے چاہے آبادی ہو چاہے بربادی ، چونکہ  آنکھیں دل کی مجرم ، دل کی محرم ہوتی ہیں اس لیے دل کی رنجوری پہ بجھ جاتی ہیں ۔۔۔۔

   اسد یاسِ تمنا سے نہ رکھ امیدِ آزادی
گداز آرزو ہا آبیار آرزو ہا ہے

لیکن یہ زندگی ہے ، زندگی جو آس پہ جی جاتی ہے ، امید پہ کی جاتی ہے ، خواہشوں سے لی جاتی ہے ، خوابوں پہ گنی جاتی اور تمناؤں پہ لی جاتی ہے ۔۔۔

جب ایک خواب مرتا ہے ،تو بندہ خود سے لڑتا ہے ۔۔۔۔۔
  جب ایک امید خآک ہوتی ہے ، تو بندہ خود سے ڈرتا ہے ۔۔۔۔لیکن اس لڑنے ، ڈرنے،  بگڑنے سے زندگی پھر سے جڑ پکڑلیتی ہے ، پھر سے نمو پانے لگتی ہے ۔۔۔
 جب ایک تمنا چاک ہوتی ہے تو بندہ خود پہ بگڑتا ہے